उपनगराध्यक्षांनी थेट रस्त्यावरून सुरू केला शासकीय कारभार..
उपनगराध्यक्षांनी थेट रस्त्यावरून सुरू केला शासकीय कारभार..
नेवासा -( महाराष्ट्र 7न्यूज वृत्तसेवा)
दिनांक **२७ जानेवारी २०२६** रोजी सकाळी **११:०० वाजता** उपनगराध्यक्ष सौ. सुखदान यांच्या दालनात नेवासा नगरपंचायतीच्या **पाणीपुरवठा व स्वच्छता विभागातील अधिकारी व कर्मचारी** यांची आढावा बैठक आयोजित करण्यात आली होती. या बैठकीबाबतच्या सूचना प्रशासनाला **२२/०१/२०२६** रोजीच कळविण्यात आल्या होत्या.
मात्र, उपनगराध्यक्ष व नगरसेवक बैठकीसाठी नगरपंचायत कार्यालयात उपस्थित झाल्यानंतर उपनगराध्यक्षांच्या दालनाची कोणत्याही प्रकारची स्वच्छता करण्यात आलेली नसल्याचे निदर्शनास आले. तसेच बैठकीसाठी बोलावण्यात आलेले संबंधित अधिकारी व कर्मचारीही गैरहजर होते. विशेष बाब म्हणजे, **नगराध्यक्षांचे दालन पूर्णतः स्वच्छ करण्यात आलेले होते.** त्यामुळे प्रशासनाकडून जाणीवपूर्वक भेदभाव केला जात असल्याचा आरोप उपनगराध्यक्ष सौ. सुखदान यांनी केला आहे. प्रशासन कोणाच्या तरी दबावाखाली काम करत असल्याचा संशयही त्यांनी व्यक्त केला.
या घटनेनंतर उपनगराध्यक्षांसह नगरसेवकांनी **नगराध्यक्षांच्या दालनात जाऊन तात्पुरती आसन व्यवस्था मांडली.** या प्रकारावर प्रतिक्रिया देताना नगराध्यक्ष डॉ. करणसिंह घुले यांनी घटनेचा **जाहीर निषेध** व्यक्त केला. तसेच त्यांच्या दालनातील काही **महत्त्वाची कागदपत्रे गहाळ झाल्याचा आरोप** त्यांनी माध्यमांशी बोलताना केला आहे.
दरम्यान, जोपर्यंत नेवासा नगरपंचायत प्रशासनाकडून **प्रशासकीय इमारतीची संपूर्ण स्वच्छता केली जात नाही** आणि **बैठकीस अनुपस्थित व निष्क्रिय कर्मचाऱ्यांवर कारवाई होत नाही**, तोपर्यंत उपनगराध्यक्ष आपला कारभार नगरपंचायत आवारातूनच चालवणार असल्याचे उपनगराध्यक्ष सौ. सुखदान यांनी माध्यमांशी बोलताना स्पष्ट केले आहे.
