श्री ज्ञानेश्वरी पालखी सोहळा : नेवासा–पंढरपूर दिंडीचे घोडेगावमध्ये भक्तिभावाने जंगी स्वागत; हरिनामाच्या गजरात अवघे गाव भक्तिरसात न्हाऊन निघाले
श्री ज्ञानेश्वरी पालखी सोहळा : नेवासा–पंढरपूर दिंडीचे घोडेगावमध्ये भक्तिभावाने जंगी स्वागत; हरिनामाच्या गजरात अवघे गाव भक्तिरसात न्हाऊन निघाले
नेवासा प्रतिनिधी!- दादा दरंदले /मंगेश निकम
श्रीक्षेत्र नेवासा येथून श्रीक्षेत्र पंढरपूरकडे प्रस्थान केलेल्या श्री संत ज्ञानेश्वर महाराज संस्थानच्या आषाढी पायी पालखी दिंडी सोहळ्याचे शुक्रवार (दि. १०) रोजी नेवासा तालुक्यातील घोडेगाव येथे अभूतपूर्व उत्साह, भक्तिभाव आणि पारंपरिक जल्लोषात जंगी स्वागत करण्यात आले. पालखीच्या आगमनाने संपूर्ण गाव भक्तिमय वातावरणाने भारावून गेले असून, घोडेगावसह परिसरातील हजारो भाविकांनी माऊलींच्या दर्शनासाठी मोठी गर्दी केली.
आषाढी एकादशीच्या निमित्ताने श्री विठ्ठल-रुक्मिणीच्या दर्शनासाठी पंढरपूरकडे निघणारी श्री संत ज्ञानेश्वर महाराजांची पालखी ही महाराष्ट्राच्या वारकरी संप्रदायातील श्रद्धा, समता, सेवा, बंधुभाव आणि अखंड हरिनाम भक्तीचे जिवंत प्रतीक मानली जाते. संतश्रेष्ठ ज्ञानेश्वर महाराजांनी ‘भावार्थदीपिका (ज्ञानेश्वरी)’ आणि ‘अमृतानुभव’ या ग्रंथांद्वारे अध्यात्म, मानवता आणि समतेचा संदेश जनमानसापर्यंत पोहोचविला. त्याच संतपरंपरेचे दर्शन या पालखी सोहळ्यात घडत असल्याने भाविकांसाठी हा सोहळा केवळ धार्मिक कार्यक्रम नसून आध्यात्मिक पर्व ठरतो.
पालखी गावात दाखल होताच टाळ-मृदुंगाचा निनाद, “ज्ञानोबा-तुकाराम”च्या अखंड जयघोषाने आणि वारकऱ्यांच्या हरिनाम गजराने परिसर दुमदुमून गेला. घोडेगाव व परिसरातील विविध माध्यमिक शाळांतील विद्यार्थ्यांनी ढोल-ताशा आणि लेझीम पथकांच्या आकर्षक सादरीकरणातून पालखीचे उत्स्फूर्त स्वागत केले. पारंपरिक वाद्यांचा दणदणाट, भगव्या पताकांनी सजलेला परिसर आणि लेझीमच्या तालबद्ध सादरीकरणामुळे संपूर्ण घोडेगाव नगरी भक्तीच्या सागरात न्हाऊन निघाल्याचे चित्र पाहायला मिळाले.
भाविकांनी संत ज्ञानेश्वर महाराजांच्या पालखीचे दर्शन घेत माऊलींच्या चरणी नतमस्तक होत सुख, शांती, समृद्धी आणि विश्वकल्याणासाठी प्रार्थना केली. “राम कृष्ण हरी” आणि “ज्ञानोबा-तुकाराम”च्या अखंड नामघोषाने परिसर चैतन्यमय झाला होता.
दिंडीतील वारकऱ्यांसाठी घोडेश्वरी माध्यमिक विद्यालय येथे मुळा सहकारी साखर कारखान्याचे संचालक वसंतराव सोनवणे व त्यांच्या परिवाराच्या वतीने महाप्रसादाची व्यवस्था करण्यात आली होती. यावेळी सोनवणे परिवाराच्या हस्ते श्री संत ज्ञानेश्वर महाराज संस्थान, नेवासा येथील ह.भ.प. देविदास महाराज मस्के यांचा शाल, श्रीफळ आणि पुष्पहार अर्पण करून सन्मान करण्यात आला.
वारकऱ्यांची सेवा ही माऊलींची सेवा मानली जाते, या भावनेतून घोडेगाव ग्रामपंचायतीच्या वतीने प्रशासक श्री. सवई व ग्रामसेवक श्री. देशमुख यांच्या मार्गदर्शनाखाली पिण्याचे शुद्ध पाणी, स्वच्छता, आरोग्य सुविधा तसेच इतर आवश्यक सोयी-सुविधांची उत्कृष्ट व्यवस्था करण्यात आली. ग्रामस्थ आणि सेवाभावी कार्यकर्त्यांनीही वारकऱ्यांच्या सेवेत उत्स्फूर्त सहभाग घेतल्याने संपूर्ण गावात सेवाभावाचे दर्शन घडले.
याप्रसंगी पंचायत समितीच्या माजी सभापती सुनीताताई गडाख, हर्षदाताई काकडे, मुळा एज्युकेशन संस्थेचे उपाध्यक्ष उदयन गडाख, माजी आमदार पांडुरंग अभंग, सोनई पोलीस ठाण्याचे मोरे साहेब, आरोग्य विभागाचे अधिकारी व कर्मचारी तसेच विविध क्षेत्रांतील मान्यवरांनी पालखी सोहळ्यास उपस्थित राहून संत ज्ञानेश्वर महाराजांचे दर्शन घेतले.
पालखी सोहळ्याच्या सुरक्षिततेच्या दृष्टीने अहिल्यानगर पोलीस दलाच्या बॉम्ब शोधक व नाशक पथकाने संपूर्ण परिसराची कसून तपासणी केली. या पथकात पीएसआय अंबादास हुलगे, दिनेश पळसकर, संजय येठेकर, अजय कदम, सुभाष पठारे, शरद वर्पे आणि युवराज पवार यांचा समावेश होता. तपासणीनंतर पथकातील अधिकाऱ्यांनी माऊलींचे दर्शन घेऊन संपूर्ण विश्वात शांतता, सुख-समृद्धी आणि बंधुभाव नांदावा, अशी प्रार्थना केली.
सायंकाळी सुमारे चार वाजता घोडेगावकरांनी टाळ-मृदुंगाच्या गजरात, हरिनामाच्या अखंड घोषात आणि “ज्ञानोबा-तुकाराम”च्या जयघोषात पालखी सोहळ्याला भावपूर्ण निरोप दिला. या प्रसंगी ग्रामस्थ, वारकरी, महिला, युवक आणि भाविक मोठ्या संख्येने उपस्थित होते.
वारकरी परंपरेचा हा सोहळा केवळ धार्मिक उत्सव नसून समता, सेवा, शिस्त, सदाचार, पर्यावरणप्रेम आणि मानवतेचा संदेश देणारे लोकप्रबोधनाचे प्रभावी माध्यम असल्याचे पुन्हा अधोरेखित झाले. माऊलींच्या कृपाछायेत सुख, शांती आणि विश्वकल्याणाची प्रार्थना करत हजारो भाविकांनी भक्तिभावाने पालखीला निरोप दिला. भक्ती, सेवा आणि समतेची अखंड परंपरा जपणारा हा सोहळा घोडेगावकरांच्या स्मरणात कायम राहील, अशी भावना उपस्थित भाविकांनी व्यक्त केली.
