*आमदार विठ्ठलराव लंघे यांच्या वाढदिवसानिमित्त वृक्षारोपण सप्ताहाचा शुभारंभ* *’गाव तेथे झाड’ उपक्रमाची बालाजी देडगावातून उत्साहात सुरुवात; ग्रामस्थ, युवक व पत्रकारांचा उत्स्फूर्त सहभाग*
*आमदार विठ्ठलराव लंघे यांच्या वाढदिवसानिमित्त वृक्षारोपण सप्ताहाचा शुभारंभ*
*’गाव तेथे झाड’ उपक्रमाची बालाजी देडगावातून उत्साहात सुरुवात; ग्रामस्थ, युवक व पत्रकारांचा उत्स्फूर्त सहभाग*
नेवासा | प्रतिनिधी – महाराष्ट्र 7न्यूज वृत्तसेवा
आमदार विठ्ठलराव लंघे पाटील यांच्या वाढदिवसानिमित्त पर्यावरण संवर्धनाचा संदेश देणाऱ्या ‘गाव तेथे झाड’ या उपक्रमांतर्गत वृक्षारोपण सप्ताहाचा शुभारंभ बालाजी देडगाव येथे उत्साहात करण्यात आला. यावेळी ग्रामस्थ, ज्येष्ठ नागरिक, युवक, महिला तसेच पत्रकार बांधवांनी मोठ्या संख्येने उपस्थित राहून वृक्षारोपणात सक्रिय सहभाग नोंदवला.
वाढदिवस हा केवळ औपचारिक शुभेच्छांचा दिवस न ठरता समाजोपयोगी कार्यातून साजरा व्हावा, या उद्देशाने कार्यकर्त्यांनी वृक्षारोपणाचा अभिनव उपक्रम राबवला. पर्यावरण संवर्धनाची गरज ओळखून संपूर्ण नेवासा तालुक्यात विविध गावांमध्ये वृक्षारोपण सप्ताह राबविण्याचा संकल्प करण्यात आला असून, “हरित नेवासा” घडविण्यासाठी व्यापक जनसहभाग निर्माण करण्याचे उद्दिष्ट ठेवण्यात आले आहे.
बालाजी देडगाव येथील आमदार विठ्ठलराव लंघे पाटील यांच्या कार्यकर्त्यांनी वाढदिवसाला सामाजिक बांधिलकीची जोड देत समाजासमोर एक सकारात्मक आदर्श निर्माण केला. फटाके, हार-तुरे आणि अनावश्यक खर्च टाळून वृक्षारोपणासारख्या पर्यावरणपूरक उपक्रमातून वाढदिवस साजरा करण्याचा संदेश या निमित्ताने देण्यात आला.
या उपक्रमाचे सर्वत्र कौतुक होत असून, आमदार विठ्ठलराव लंघे पाटील यांनी वृक्षारोपण सप्ताह यशस्वी करण्यासाठी परिश्रम घेणाऱ्या सर्व कार्यकर्त्यांचे, ग्रामस्थांचे आणि सहभागी नागरिकांचे आभार व्यक्त केले. त्यांनी आपल्या संदेशात म्हटले आहे की, “सामाजिक बांधिलकी जपत वृक्षारोपणाच्या माध्यमातून वाढदिवस साजरा होणे, हे माझ्यासाठी अत्यंत आनंदाची आणि भाग्याची बाब आहे. जनतेचे प्रेम, विश्वास आणि आपुलकी हाच माझा खरा अभिष्टचिंतन सोहळा आहे.”
या वृक्षारोपण कार्यक्रमात बालाजी देडगाव येथील आमदार विठ्ठलराव लंघे पाटील यांचे समर्थक, ग्रामस्थ, ज्येष्ठ नागरिक, युवक तसेच पत्रकार मित्र मोठ्या संख्येने सहभागी झाले होते. वृक्षारोपण सप्ताहाच्या माध्यमातून पर्यावरण संरक्षणाचा संदेश जनतेपर्यंत पोहोचविण्याबरोबरच भविष्यात अधिकाधिक झाडे लावून त्यांचे संगोपन करण्याचा निर्धारही यावेळी व्यक्त करण्यात आला.
