*उपमुख्यमंत्री एकनाथराव शिंदे यांच्या नेतृत्वाखाली जिल्हा बँकेची लढाई लढणार*
*आ. विठ्ठलराव लंघे यांची स्पष्ट भूमिका; महायुतीतील समन्वयावरून नाराजी, शिवसेनेने सर्व जागांवर अर्ज दाखल करण्याची घेतली भूमिका*
अहिल्यानगर :
अहिल्यानगर जिल्हा मध्यवर्ती सहकारी बँकेच्या निवडणुकीच्या उमेदवारी अर्ज दाखल करण्याच्या अखेरच्या दिवशी राजकीय घडामोडींना वेग आला असून, शिवसेनेनेही निवडणुकीच्या मैदानात आपली भूमिका स्पष्ट केली आहे. या पार्श्वभूमीवर नेवासा विधानसभा मतदारसंघाचे आमदार विठ्ठलराव लंघे यांनी, “शिवसेनेचे नेते तथा उपमुख्यमंत्री एकनाथराव शिंदे यांच्या नेतृत्वाखाली आणि त्यांच्या आदेशानुसार जिल्हा बँकेची निवडणूक लढविण्याची आमची भूमिका आहे,” असे स्पष्ट केले.
जिल्हा बँकेची निवडणूक बिनविरोध करण्यासाठी विविध पातळ्यांवर हालचाली सुरू असतानाच शिवसेनेने स्वतंत्रपणे उमेदवारी अर्ज दाखल करण्याची भूमिका घेतल्याने सहकार क्षेत्रातील राजकीय समीकरणांना नवे वळण मिळाले आहे. शिवसेनेच्या स्थानिक पदाधिकाऱ्यांना आणि नेतृत्वाला विश्वासात घेऊन निर्णयप्रक्रिया व्हायला हवी होती, अशी भूमिका यावेळी आ. लंघे यांनी मांडली.
“निवडणुकीच्या घडामोडी सुरू असताना आम्हाला विश्वासात घेणे अपेक्षित होते. मात्र तसे झाले नाही. त्यामुळे शिवसेनेच्या वतीने राहिलेल्या सर्व जागांवर उमेदवारी अर्ज दाखल करण्याचा निर्णय घेण्यात आला,” असे आ. लंघे यांनी सांगितले.
दरम्यान, जिल्हा बँकेच्या निवडणुकीत शिवसेनेने विविध मतदारसंघांत उमेदवार उभे करण्याची प्रक्रिया सुरू केली असून, संगमनेर आणि शेवगावसह अन्य मतदारसंघांतही उमेदवारी अर्ज दाखल करण्यात आले आहेत. त्यामुळे आतापर्यंत सुरू असलेल्या बिनविरोध निवडणुकीच्या चर्चेला आता वेगळे राजकीय वळण मिळाले आहे.
आ. लंघे यांनी पुढील निर्णयाबाबतही भूमिका स्पष्ट करताना सांगितले की, “शिवसेनेचे नेते आणि उपमुख्यमंत्री एकनाथराव शिंदे साहेब यांचा पुढील काळात जसा आदेश येईल, त्यानुसारच आम्ही निर्णय घेऊ.” त्यामुळे जिल्हा बँकेच्या निवडणुकीतील पुढील राजकीय दिशा शिंदे यांच्या निर्णयाकडे लागून राहणार असल्याचे स्पष्ट झाले आहे.
अर्ज दाखल करण्याची प्रक्रिया पूर्ण झाल्यानंतर आता छाननी आणि माघारीच्या टप्प्यात कोणते राजकीय समीकरण आकाराला येते, याकडे जिल्ह्यातील सहकार क्षेत्राचे लक्ष लागले आहे. २१ संचालक पदांसाठी मोठ्या संख्येने उमेदवारी अर्ज दाखल झाल्याने निवडणुकीचे चित्र सध्या चुरशीचे बनले आहे.
